بسپورەكێ راگەهاندنێ گوت"راگەهاندنا كوردی یا نەخوشە و پێویستی ب چارەسەریێ هەیە و باشترین چارەسەری ژی هەبوونا یاسایەكێ یە".
د چارچوڤێ كونفرانسا (میدیا ئەلكترونی و پێدڤی ب یاسایی كرنێ)ئەوا ل حەفتیا دەربازبوویی ل هەولێرێ ب بەرهەڤبوونا پسپور و یاسازان و رۆژنامەڤانێن هەموو پارێزگەهێن هەرێمێ هاتیە سازكرن،چەندین بوچوون هاتنە دیاركرن،ب كورتی ئەڤ راپورتە ژێ هاتە ئامادەكرن.
پشتی پرۆژە یاسایا میدیا ئەلكترونی هاتیە خواندن،دەرفەت بو بەرهەڤبوویان هاتە دان و ماموستایێ راگەهاندنێ ل زانكویا سلێمانیێ(هەڤال ئەبو بەكر)گوت"ئەز نە دگەل یاسایێ دامە،هەبوونا یاسایان بو ڤی واری ئانكو بەرتەنگرنا سنورێن ئازادیێ و هزر نەكەن كو ئەم گەلەك ژ ئەمریكا و ئەورۆپا پێشكەتی و زاناترین،لەومان ئەم یاسایێ دێ دەرێخین و وانا هێشتا چ یاسا نەیی،باشترین تشت دڤێت (میساق شەرەف)هەبیت و پابەندبین ب وێ میساقێ".
هەڤال ئەبو بەكر ب دەنگێ خو یێ بلند هولا كونفرانسی بێ دەنگ كر و گوت"گەلەك وارێن دیتر گرنگتر و فەرترن ئەم یاسایێ بو ئامادەبكەین،نەك بو میدیا ئەلكرتونی،ب من وەر ئەڤ یاسایە سەركەتنێ نائینیت،سایتەك ل سوێد دەردڤیت و سێرڤەرێ وێ ل ئەمریكایە،ئەرێ ل ڤی دەمی دێ ل گور كیژان یاسایێ سایتێ زێدەگاڤی كری هێتە سزادان؟،گەلەك گرنگترە یاسا بو تێلەفزیون و ئێزگەیان بهێتە دانان كو جهی َداخێ یە یاسا كارێ رێكخستنا رۆژنامەگەریێ ب تنێ بو وارەكێ یە و چەندین كێماسی ژی تێدا هەنە تا نوكە وەزارەتا رەوشەنبیری یاسایەكا رێكخستی بو تێلەفزیون و ئێزگەیان نە دەركریە ".
د.مەغدید سەپان بەرۆڤاژی بوچوونێن ماموستا هەڤالی ئاخفت و گوت" ب دیتنا من هەبوونا یاسایەكی بو سایتێن ئەلكرترونی كارەكێ گەلەك گرنگە و گەلەك یا پێویستە،ب دیتنا من راگەهاندنا كوردی یا نەخوشە و پێدڤی ب هاریكاریێ هەیە و باشترین هاریكاریژی هەبوونا یاسایەكی یە".
حامد محەمەد عەلی،سكرتێرێ سەندیكا رۆژنامەنڤیسێن كوردستانێ هەبوونا یاسایەكی بو هەموو وارەكی ب كارەكێ گرنگ و پێویست زانی،لێ گوت"دڤێت ئەڤ یاسایە هەڤدژی یاسایێن دی نەبیت،75%ێ ژ ڤێ یاسایێ وەكو یاسایا رۆژنامەگەریێ یە و د شیاندایە ئەڤ یاسایە وەك برگە و مادە ل سەر یاسا رێكخستنا كارێ رۆژنامەگەریێ بهێتە زێدەكرن".
ناڤهاتی ئەوژی دیاركر كو راستە تەكنولوجیا گەلەك پێكشكەفتیە،لێ" تا نوكەژی نڤێسەرێن ب ناڤ و دەنگێن جیهانێ گوتارێن خو د رۆژنامەیێن چاپكری دا بەلاڤ دكەن نەك سایتان و دگەل ڤێ چەندێ ژی رۆژنامەگەریا ئەلكترۆنی چ بها بو رۆژنامەگەریا چاپكری نەهێلایە".
هەلگور عەبدولوەهاب،رێڤەبەرێ گشتی یێ راگەهاندنێ ل وەزراەتا رەوشەنبیری و لاوان دگەل یاسایێ بوو و خواست هند برگەیێن دیژی لێ زێدەبكەن و گوت"راستە ل هەرێما كوردستانێ یاسایەكا تایبەت ب كارێ تێلەفزیون و ئێزگەیانڤە نینە،لێ ل سالا 2005ێ رێنمایی هاتبونە بەلاڤكرن و هەكە پێگیری ب وان رێنماییان بهێتەكرن كارەكێ باشە".
پەرلەمانتارێن بەرهەڤبوویی دگەل هەبوونا یاسایێ بوون ،لێ پەیمان عزەدین گوت"تو نەشێ یاسایەكا تەندروست بو جڤاكەكێ نە تەندروست دەربێخی".
رۆژنامەڤان بەختیار سەعید گوت"دەركرنا یاسایێ بوچیە هەكە كار پێ نەهێتە كرن و دادگەه د سەربەخو نەبن،سەرا بەلاڤكرنا گوتارەكێ یێ بوویە كێشە ل سەر من و ئەڤە 22 رونشتن ل دادگەها سلێمانیێ هاتنە برێڤەبرن و هێشتا بریارا داویێ نەدەرچوویە ئەڤە دوو سال ژی دەربازبوون،جارێ بلا دادگەهێن خو ئەكتیڤ كەین".
ئاوات عەلی،سەرپەرشتێ سایتێ هاولاتی گوت"خوزی ئەڤ رونشتنە ل دۆر راستڤەكرنا یاسایا رێكخستنا كارێ رۆژنامەگەریێ ل هەرێما كوردستانێ برێڤەچووبا ژبەركو هێشتا ئەو یاسا یا پری كێشەیە؟.
رۆژنامەڤان فازل نەجیب گوت"هوون و خودێ هەكە هوون بەلا خو ژڤێ یاسایێ ڤەنەكەن،یاسایا دیتر هێشتا بەلایە و نە ئێك لابوویە دوو دادوەران نەخواندیە و كارە پێ نەهاتیە كرن تا ڤێ یاسایێ دەردكەین".
ل داویێ د.مەغدید گوت"راگەهاندنا مە گەلەك بەرەلایی یە و وگەلەك جاران هێشتا رۆژنامەڤانێن مە یێ رۆلێ پولس و حاكمان دگێرن و راگەهاندن ل كوردستانێ چ دەسهەلا نینە".
عەلی كەریم،سەرۆكێ ئەنستتیوتا كوردستان بو مافێ مرۆڤی كو ئەو ب رێكخستنا ڤی كاری رابوویە،دبەرسڤا بوچوون و رەخنەیێن ئامادەبوویاندا دیاركر كو ژبو ئامادەكرنا ڤی پرۆژەی مفا ژ 22 یاسایێن وەلاتان هاتیە وەرگرتن و و بوچوونا 250 رۆژنامەڤانێن هەرسێ پارێزگەهان وەرگرتیە ،لێ سەرپەرشتێ مالپەرێ ئاوێنە و هاولاتی بەرسڤا وی دا و گوتێ"شنیكا ئەم ئاگەهدارێ ڤی پرۆژەینە و پێشتر ئەم نەهاتینە ئاگەهداركرن.
ليست هناك تعليقات:
إرسال تعليق